काका–भतिजी हत्या प्रकरणको रहस्य खुल्यो : हत्यारा आफ्नै दाजु

डबल मर्डरका त्रिपल अनुहार

प्रकाशित मिति: 4:16:25 pm, July 26, 2015

गुल्मी, साउन १० – गत शुक्रवार विहान गुल्मीको पिपलधारामा रुखको टुप्पोमा भतिजी झुण्डिएको अवस्थामा र काका त्यसको फेदमा मृत फेला परेको घटना आत्माहत्या नभई हत्या भएको प्रहरीले अनुसन्धानबाट खुलेको छ । पिपलधारा–८ नादीगाउँमा काका पर्ने ३८ वर्षिय वेलबहादुर मुखिया र १८ वर्षिया भतिजी सिता मुखियालाई मार्ने मुख्य अभिुक्त मृतक वेलबहादुरकै ४४ वर्षीय दाजु नारायण मुखिया भएको जिल्ला प्रहरी कार्यालय गुल्मीले आज पुष्टी गरेको हो ।
साउन ८ गते राती १२ बजे देखि १ वजेको बीचमा अभिुक्त नारायण मुखिया, सोही गाउँको २१ वर्षीय बाशुदेव जि.सी., र पिपलधारामा ५ को विष्णुबहादुर मुखियाले घरको दलानमा सुतिरहेका भाई वेलबहादुर मुखियालाई चिरुवा दाउराले कुटपिट गरी हत्या गरेको प्रहरीले जनाएको छ ।

सोही ठाउँमा रहेकी सीता मुखियाको पनि तिनै जनाले मुख छोपेर हत्या गरी नजिकै रहेको खनियाँको रुखमा लगेर उनकै चुन्नीले झुण्डाएको र वेलबहादुरको सव पनि त्यही रुख तल लगेर फालिएको प्रहरीले जनाएको छ ।
घटना विवरण यस्तो छ
प्रहरीका अनुसार अघिल्लो दिन एक वजेको समयमा मृतक वेलबहादुरकै घरमा बसेर सीता र वेलबहादुरले चाउचाउ संगै मादक पदार्थ सेवन गरेका थिए । त्यसपछि वेलबहादुर माथि पिपलधारा वजार तिर लागे भने सीता भने आफ्नो माईतीमा गईन् । त्यसै दिन साँझ करिव ६ बजेतिर वेलबहादुरकी आमासंग पैचो लिएको चामल बुझाउन भन्दै सीता आईन्न र फर्किइन् । साँझको ६ बजेर ५ मिनेनको समयमा बेलबहादुर माथी वजारबाट घर आए ।
अँध्यारो भए पछि सीता पुनः बेलहादुरको घरमा आईन र घटना घटेको समयसम्म संगै रहीन् । राती करिव ११ वजेको समयमा आएकी सिताले वेलबहादुरकी आमा मुगा मुखियालाई ढोका खोल्न लगाई भित्र पसिन् । आमाले गाली गर्दै कोठामा गएर सुत्न भन्दै आफु आफ्नो कोठामा गईन् ।
कोठामा गए पछि अभियुक्त नारायण मुखियाले ठूलो स्वरमा क्यासेट बजाउन सुरु गरेको । रातको समयमा ठूलो स्वरमा क्यासेट बजाए पछि अरु गाउँवासीले घटना नसुनुन् भन्ने अभिप्राय राखेको प्रहरीले उल्लेख गरेको छ ।

नारायण मुखिया धान रोप्न भनि असार २९ गते तम्घासबट घर गएका थिए भने मृतक वेलबहादुर पनि असार ३१ गते धान रोप्न भन्दै तम्घासबाट घरतिर लागेका थिए ।
साउने सक्रान्तिको दिन दाजु–भाईसंगै बसेर चाँडसमेत मानेका थिए । त्यही दिन समुहको बैठकमा भाई वेलबहादुरले दाजु नारायणले कृषि समुहको रकम हिनामिना गरेको कुरा उठाए । त्यसपछि उनीहरुबीच झगडा सुरु भएको थियो ।
स्थानीयका अनुुसार नारायण चोरी र अपराधीक घटनामा जोडिएका व्यक्ति हुन् । ठेक्का पट्टामा लागेका उनले तम्घासमा राम्रै पैसा कमाउँदै आएका थिए । मृतक वेलबहादुर र नारायणकी श्रीमती डेरामा तम्घास वस्दै आइरहेका थिए । विवाहित सीता भने श्रीमानबाट छुट्टिएर माईतीमा बस्दै आएकी थिइन् ।
यस घटनाले त्यस नादीगाउँमा भएका अन्य त्यस्तै अपराधिक घटनाको पनि पोल खुल्ने देखिएको छ । जिल्ला प्रहरी प्रमुख डिएसपी हिमालयकुमार श्रेष्ठले त्यहाँका अन्य पुराना घटनाको पनि सुक्षम ढंगले अनुसन्धान गर्ने बताएका छन् । यस घटनामा प्रहरी निकै छिटो हत्यारा खोज्न सफल भएको छ । अभिुक्तहरु तिनै जनालाई नियन्त्रणमा लिई अनुसन्धान भई रहेको प्रहरीले जनाएको छ ।

Labels: News